កោះតៃវ៉ាន់៖ រយៈពេល ៣ឆ្នាំក្រោយពេលដែលពិភពលោកបានធ្លាក់ចូលទៅក្នុងវិបត្តិសកលកូវីដ-១៩ កោះតៃវ៉ាន់បានប្រកាសថាពលរដ្ឋរបស់ខ្លួនទាំងអស់ពុំចាំបាច់មានកាតព្វកិច្ចពាក់ម៉ាស់ក្នុងទីកន្លែងបិទជិតទៀតឡើយ ដោយនៅតែមានការហាមឃាត់ក្នុងកន្លែងសំខាន់ៗមួយចំនួនប៉ុណ្ណោះ។
ចំពោះការហាមឃាត់មួយចំនួនដែលនៅតែបន្តរួមមានដូចជា ការតម្រូវឱ្យនៅតែពាក់ម៉ាស់នៅមន្ទីរពេទ្យ ឬវិទ្យាស្ថានវេជ្ជសាស្រ្ត រួមទាំងមធ្យោបាយធ្វើដំណើរសាធារណៈ។ នេះបើយោងតាមមជ្ឈមណ្ឌលកណ្តាលនៃការបង្ការរោគរាតត្បាតរបស់កោះតៃវ៉ាន់ នៅថ្ងៃចន្ទ ទី២០ ខែកុម្ភៈម្សិលមិញនេះ ដែលមានន័យថាពលរដ្ឋពុំចាំបាច់ពាក់ម៉ាស់នៅតាមទីកន្លែងនានាដូចជាភោជនីយដ្ឋាន ផ្សារទំនើប និងការិយាល័យជាដើម។
ដោយឡែក ចំពោះសាលារៀននឹងត្រូវបន្ធូរបន្ថយកាតព្វកិច្ចពាក់ម៉ាស់ចាប់ពីខែមីនានេះ ដែលវិធានការនេះកំពុងត្រូវបានលើកលែង និងបន្ធូរបន្ថយជាពីរដំណាក់កាល។ បើទោះបីជាមានការប្រកាសលើកលែងពីរដ្ឋាភិបាលក៏ដោយ ក៏គេនៅតែសង្កេតឃើញថាតាមបណ្តាដងផ្លូវសាធារណៈ អគារការិយាល័យ និងនៅតាមបណ្តាហាងលក់ទំនិញនានាក៏ប្រជាពលរដ្ឋនៅតែបន្តពាក់ម៉ាស់ជាធម្មតាដដែល។
គួរបញ្ជាក់ថា កាលពីខែធ្នូកន្លងទៅ តៃវ៉ាន់បានប្រកាសពីការបញ្ចប់ការតម្រូវឱ្យប្រជាជនពាក់ម៉ាស់នៅទីកន្លែងសាធារណៈ ក្រោយពីការដាក់ចេញនូវកាតព្វកិច្ចជាង ៣ឆ្នាំ៕
